Goeie leiers dra nie krone nie - Charles James

Iemand vra so rukkie gelede wat ek dink ons land kan laat omdraai op die pad van selfvernietiging. Ek gee toe maar die cliché antwoord: “Goeie leierskap.” Hy vra toe wat ek dink goeie leierskap is. My antwoord was baie kort: “Goeie leiers kyk deur die venster as dit goed gaan en in die spieël as dit sleg gaan.”
Hierdie is woorde aangehaal uit Jim Collins se boek “Good to great.” In die boek vra Jim die vraag: “How can a good company become a great company?” Hy neem dan 1435 goeie maatskappye en ontleed hulle prestasie oor ‘n 40 jaar periode. Hy kyk ook watter maatskappye het oor ‘n 15 jaar tydperk 3 keer beter as die Amerikaanse Aandele Beurs presteer. Na al die ontledings is 11 maatskappye geïdentifiseer wat hy as “great” beskou.
Die een gemeenskaplike eienskap by al 11 maatskappye was goeie leierskap. Hy noem dit “Vlak 5 leierskap” – ek haal aan: “someone that builds enduring greatness through a paradoxical blend of personal humility and professional will”.
David Maxwell, CEO van Fannie Mae het die maatskappy van ’n $1 miljoen per dag verlies na ’n $4 miljoen wins per dag omgedraai. Toe hy ’n addisionele $5.5 miljoen pakket met sy aftrede aangebied is, het hy dit van die hand gewys en gesê die direksie moet die geld eerder terugploeg in die maatskappy.
Vlak 5 leierskap is juis wat Jesus vir ons kom modeleer het. En Paulus beskryf dit so mooi in Filippense 2. Jesus het sy kroon vir ‘n voorskoot verruil, en dieselfde gesindheid wat in Jesus was, moet ook sigbaar word in sy volgelinge se lewe. Heel prakties skryf Paulus in Filippense 2:3: “Moet niks uit selfsug of eersug doen nie, maar in nederigheid moet die een die ander hoër ag as homself.”
Goeie leiers is hulle wat hulle krone vir voorskote verruil, wat hard werk om dit vir ander beter te maak, nie smag na die kollig en mag nie, wat in die spieël kyk as dit sleg gaan en deur die venster as dit goed gaan. Dit is sulke leier wat die kerk, die land en die wêreld nodig het!
ONTHOU PELLISSIER SE SEISOEN VAN DANKBAARHEID wat elke jaar van 1 Oktober tot einde Desember strek. Tydens hierdie drie maande nooi ons jou uit om bo en behalwe jou maandelikse dankoffer ook iets ekstra te gee.