Kind van God - Charné Viljoen

Ek kyk oor die naweek TikTok video’s en ek sien hoe ‘n vrou haarself klassifiseer as ‘n kind van God en nie ‘n Christen nie, want “Christene” is skynheilig en slegte mense so daarom kies sy eerder die woorde “kind van God,” In dieselfde asem vloek en skel sy elke persoon wie kommentaar op haar “live” video maak. Ek het eers gedink om nie kommentaar daaroor te lewer nie en oor iets anders te skryf vandag, maar hier sit ek nou en kan ek nie anders as om tog iets daaroor te sê nie.
Ons is in Lydenstyd waar ons doelbewus dit inoefen om ons eie sondige begeertes te kruisig, waar ons dit inoefen om meer van onsself te laat gaan en meer daarna te streef om soos God te word. Of jy jouself klassifiseer as ‘n Christen of ‘n kind van God, is albei veronderstel om dieselfde te beteken: Jy leef op ‘n sekere manier wat getuig van die verhouding waarin jy met God lewe. In hierdie verhouding wat jy met God het, kan jy nie anders as om deur God gevorm en vernuwe te word nie. Jy kan nie anders as om op ‘n plek in jou lewe te kom waar jy besef dat jou ou gewoontes veronderstel is om iets van die verlede te wees nie.
Ek weet dat ek soms terug gaan na ou gewoontes toe. Ek weet dat ek baie keer faal daarin om God se liefde uit te leef. Maar dan kom herinner God ons om opnuut na ons eie lewens te kyk en te weet dat sekere optredes nie in ons lewens as Christene/kinders van God pas nie.
Ons is in die tweede laaste week van Lydenstyd. Dit is die tyd in die jaar waar ons onsself voorberei vir die grootste fees vir ons as Christene, as kinders van God – Paasfees! Wanneer ons onsself voorberei vir Paasfees, waar ons feesvier dat ons ‘n nuwe lewe deur Jesus Christus ontvang het, het ons nodig om van ons ou sondige begeertes dood te maak, te kruisig. Kom ons kruisig opnuut weer ons eie selfsugtige begeertes om ons eie koninkrykies te bou en kom ons werk saam tot eer van God en Sy koninkryk!
Vriendelike groete