GR (Gemeenteraad) Nuusflitse - Julie 2019

• Baie dankie!

Die GR wil baie dankie sê vir elkeen wat betrokke was by die Familiefees, die Paasfees, Pinkster-dienste en die Vrystaat Kunstefees. Dit was wonderlike geleenthede wat elke keer baie goeie beplanning en harde werk verg. Daar is so baie ander aktiwiteite, funksies en groepe waaroor ons baie dankbaar is. Moet asseblief nooit dink dit gaan ongesiens verby nie! Ons waardeer julle en ons is dankbaar julle vorm deel van Pellissier gemeente en ons werk saam om ‘n verskil te maak sodat die wêreld kan glo!
Die GR is ook opreg dankbaar vir die gereelde betrokkenheid van bedienings wat sorg dat mense wat nie genoeg kos, klere en die nodige sorg kry nie, ook Jesus se liefde ervaar. Mag ons hierdie Jesus-liefde ook meer en meer met mekaar deel deur ons waardering gereeld teenoor mekaar uit te spreek.

• Ons gemeente se kontantvloei is gesond! Ons inkomstes is egter so 4% onder begroting. Sien die onderstaande grafiek.

Ons is baie dankbaar dat ons gemeente-finansies steeds relatief gesond is na die eerste vier maande van die finansiële jaar (Maart 2019- Feb 2020).
Die kontantvloei is positief, maar die inkomstes is 4% minder as begroot. Ons inkomstes gedurende hierde periode bestaan hoofsaaklik uit eredienskollektes, dankoffers en dan die inkomstes van die Familiefees en die Donkie-vertoning wat aangebied is.
Die dankoffers was ongeveer R 150 000 onder begroting, maar die Familiefees se inkomstes was baie goed en was R 96 000 beter as begroting wat die tekort verminder het. Die eredienskollektes is R 56 000 onder begroting.
Die uitgawes soos in die grafiek gesien kan word, is baie mooi onder beheer.
Die boufonds beloop tans R 802 000. Die Gemeenteraad is steeds besig om moontlikhede te ondersoek sodat die bouwerk kan begin om die fasiliteite wat so nodig is, daar te stel.
Ons het ook ‘n skenking ontvang van ‘n afdak en solar-elektrisiteit installasie wat die elektrisiteitskostes van die kerkkantoor beduidend sal verlaag.
Gemeenteraad Groete